एक्कैसम शताब्दीक हाट पर

विकास वत्सनाभ मैथिली काव्य-जगतक युवा-पीढ़ी सँ सम्बद्ध सुपरिचित कवि छथि। प्रकाशनक नामपर हिनक किछुए कविता प्रकाशित छनि, एखनधरि कोनो संकलन नहि, कोनो पुरस्कार नहि। 'ई-मिथिला' पर एकटा पैघ अंतरालक बाद हिनक किछु कविता प्रस्तुत अछि। एहि कविता सभक संबंध मे तत्काल एतबे कहब कि विकासक कविताक अपन ग्रामर, अपन सिंटेक्स छनि। एतबे नहि हिनक डिक्शनरी सेहो अदभुत छनि। खास कें भाव आ शब्दक संग विकासक ट्रीटमेन्ट गजब कें होइत छनि। सभटा कविता हिनक आइडेंटिटी बनि क' सोझां आबि रहल अछि। सभ सँ आशाजनक गप्प ई अछि कि एहि कविता सभ मे समयक पहिचान अभरि रहल अछि। अलग-अलग मूडक कविता रहलाक बादहुँ सभटा कविता अपन टटकापन आ डीप इमोशनक अंडरकरेंटक संग पाठकवर्ग कें बेस प्रभावित करैत अछि आ बेर-बेर पढ़ल जयबाक मांग करैत अछि। हमरा सभ कें एहि  युवा स्वर पर गम्भीरता सँ नजरि रखबाक चाही।

विकास वत्सनाभक किछु कविता ::

1).  प्रेम आ डिस्कॉउन्टक मौसम 

जनवरी सँ मार्च धरि...अगस्त सँ अक्टूबर धरि...किछु मास छै अनारकली
जाहि मे हमर-अहाँक प्रेम 
भ' उठैत अछि 
कनेक बेसी सेहन्तगर

अलना पर झुलैत अछि
अहाँक कोशिलिया
हमर एकटा ब्रांडेड जीन्स
जे अहाँ बेसाहलौं अछि
जन्मदिनक मास भरि बाद
अहाँक पाँजर धेने ओ जे सुतल अछि धोधि बला टेडी
ओकर पेट मे भरल छैक
हमर गोल्डफ्लेकक धुँआ
हमर पोकिटखर्चाक कंजूसी कतेक मनलग्गु होएइ ने
भोर सँ साँझ धरि
नगरक चौहद्दी छानब
मोल-भाव करैत भगैत रहब
आ मुनहारि साँझ
ओलाक कूपने होस्टल पहुँचब
हाथ मुँह धोइतहि मँगायब
डिस्काउंटक डामिनोज पिज़्ज़ा
ऐरसेलक नाइट पैक सँ राति केँ करब भोर
ओह ! अहि बैमनमा मौसम मे
अहाँक इथिनिक परिधान देह केँ ऐंचेने झिकल
अहाँक पेराबोला सन सेल्फ़ी
आ आँखि मे मधुबाला सन
लेकमीक मसीह काजर बड्ड सोह परैत छी अनारकली! आउ ने एमरीदा फेर सँ
कोनो भूतियाएल मनमीत सन
हे ! किरिया खाय छी हम
भरि पोख अहाँ सँ करब प्रेम
एकटा हेहरु भेल माय सन
जकरा बेसी सिनेहगर भ' जाइछ
कुम्भ मे हरायल फेर आपिस भेटल बेटा

 2). स्पेस 

नगरक असंख्य भीड़ मे 
रहैछ एकटा दुनिया
'मॉल' मे पाया कातक दुनिया
'सिनेमा' मे अंतिम सीटक दुनिया
उद्यान मे झारक कातक दुनिया
आँजुर भरि नेहक लेल
झिझिरकोना खेलाइत दुनिया ।
जे चाहै छै कने बिलमओ 'ट्रैफिक'किंवा परैत रहौ अछार आ
'ओवरब्रिजक' छत्ता मे ओ भीजैत-रहै एकदोसरक संग
ओ चाहै छै बन्न भ' जाओ मेट्रो
नहुँ-नहुँ ससरौ सिटी बस आ
घंटा धरि बेसी थाम्हि सकै - ओ एकदोसरक हाथ।
अपने मे हेरायल ई दुनिया
मँगैत छैक 'स्पेस' चहुंदिस लपलपाइत आँखि सँ
जे घुरै छै ओकरा जैंह-जतर
जेना टेम्पूबला घूरै छै कतका ऐना सँ।
ई दुनिया देखैत छैक अम्बेदकर के-चौबटिया पर ठाड़ पोथी धेने
फुटैत छै ओकरा मे भरोखक इजोत
न्यायालय केर गुम्बज ओकरा अभरैत छै
मनोकामनाक सिद्ध पीठ सन
ओ हमरा अहाँ सँ भगैत/बँचैत
सुस्ता अबैत छै सिन्धुक कछेर सँ।
मुदा कतेक दिन खेपतै एना, कोना अनामति रहतै ई दुनिया ?तैं एकरा जीबैत रहबा लेल
पसार' दियौ पाँखि चुनमुन्नी के
उड़' दियौ निधोख प्रेमक अकास मे
आ हम खटाउंस नहि मनुख भ' देखि ओकरे आँखि सँ ओकर दुनिया
हरियर-एक रंग मोनक चास सन
लाल-एक रंग सबहक खून सन।

3). एकटा अनुत्तरित प्रश्न 

एक्कैसम शताब्दीक हाट पर 
फ्लिपकार्ट सँ पनही किनैत मनुख
मनुख नहि -
एकटा यांत्रिक जीन थिक
जे मशीनक चाबुक सँ हंकाएत
अपसियाँत भगैत
जमीनक मंगल सुड्डाह क'
ठिकिया रहल अछि अकाशीय मंगल

एकर धमनी मे बहैत शोणित मे
मिझराएल छै ऐसिड
एकर माथक कोशिका मे
मढ़ल छै सिलिकॉन
आ एकर अतड़ी मे गुहल छै
कॉपरक महीन तार
जे एकर चेतनाक अचिया फुकि
डाहि रहल छै हिरोशिमा-नागासाकी
ई अपन निर्माणक ओरियान मे
पांगि रहल छै हरियरी
उपछि रहल छै पोखरि
भत्थन क' रहल छै इनार
आ बन्नुक तनने ओगरबाहि करैत
बतहा कुक्कुर सन
भूकि रहल छै अनहोनिक आगम
ई भाववाची विशेषणक नरेटी दबा
लांक्षित करैत छै जातिए संज्ञा
आ विज्ञानक व्याकरण बिनबुझने
लिख रहल छै विकासक महाकाव्य
जाहि मे संवेदनाक उद्घोष नहि
निहित छै आफदक अलंकार
एकर अपसोगारथी प्रवृति
संपदा के मटियामेट करबा पर बिर्त
विपदा केँ हहकारैत
मनुखक भविष्य पर ठाढ़ करैत छै
विगुम प्रश्नचिन्ह !
जकर उत्तर किंसाइत हेतैक वएह

से मुदा कहिया ?
एकटा अनुत्तरित प्रश्न...

4). ई केहन गाम छै 

सकुचैत देशान्तरक मध्य
उपजैत नव वैश्विक परिवेश मे
समुच्चा ग्लोब
सहटि क' भेल छै एकटा गाम

गाम, जाहि मे एके संग
विकासक बटगबनी गबैत छै
मेसोपोटामिया आ मोहनजोदड़ो

गाम, जाहि मे
वाल स्ट्रीटक पीड़ा सँ
ठोहि पारि कनैत छै दलाल स्ट्रीट
एहि गाम मे
साम्यवादक घेंट मोकने काबिज छै
मुठ्ठी भरि लोक
जे पनामा किंवा स्विस मे
नून चटा मारि रहल छै
गामक सेंसेक्स

एहि गामक वातानुकूलित छाहरि मे
मौला रहल छै
कुजरनिक ढाकी मे राखल
पटुआ आ परोड़
ई गाम अपन इसखीक हाहुति मे
उजारि रहल छै चार
आ, चार परक तिलकोर

एहि गामक अट्टालिकाक नौ' मे
समाधिस्थ छै सहस्रो एकचारी
जकर लेखा-जोखा
नहि भेटैत छी कोनो आर्काइव मे
ई गाम अपन उद्योगक आँच मे
सुड्डाह केलकै
कतेको सिक्की मौनी
घोंटैत गेलै नहुँ-नहुँ
कतेको घरक कमौनी
आ विकासक लौडिस्पिकर फूंकि
पचा गेलै
पसीखाना सँ अबैत विपत्तिक गीत

एहि गामक लोक आब नहि
ढेरियबै छै गोबर-करसी
कहाँ देखैत छियै मोरंग बाली केँ
सुकरातीक लेल बनबैत दियौरी
बनेबो किएक करतै ?
ओकरा कोनो बुझल नहि छै
जे रूस पठौतै यूरिया
आ कुरियर करतै चीन
लच्छाक लच्छा भुकभुक़िआ
ई जे गाम छै
से उपभोगक एक विराट मंच
आ रचैत छै स्वांग
मनुख केँ सुखितगर बनेबाक
मुदा बिसरल छै
जनकल्याणक साबिक मंत्र
सर्वे भवन्तु सुखिन:

●●●

विकास वत्सनाभ सँ vikash51093@gmail.com पर सम्पर्क कयल जा सकैत अछि। हिनक अन्य रचना एतय सँ पढ़ी - 

आबो तेजू ई कोकनल बुधि