रूपेश त्योंथ केर किछु शीर्षकहीन कविता




रूपेश त्योंथ' केर पत्रकारिता सं हमरा  सभ गोटे परिचित छी. हिनक दू टा पोथी सेहो प्रकाशित छनि. एक कविता संग्रह तं दोसर व्यंग्य संग्रह. मुदा हिनक पहिल क्रश आरम्भे सं कविता  रहलनि अछि , सेहो स्कूलिए टाइम सं. 'ई-मिथिला'क एहि प्रस्तुति मे हिनक किछु कविता सभ परोसल जा रहल अछि. ई कविता सभ कथ्य आ शिल्पक स्तर पर प्रभावित तँ करिते अछि, मैथिली काव्य कर्मक जे अपन छइब-छटा छैक तकरा भावक संग जाहि तरहें मिज्झर कए संवेदनाक कॉकटेल बना पाठकक हृदयतल सं को -रिलेट करैत अछि ई सेहो स्वयं मे नोटिस देबा योग्य चीज़ अछि. पढ़ल जाउ हिनक किछु शीर्षकहीन कविता - मॉडरेटर

         (१)

ई दुनिया 
बुन्न-बुन्न शोणितक 
हिसाब मंगै छै 
आ जखन सुखाइ छै शोणित 
तं फेर डाहि दै छै 
खोचाडि-खोचाडि 

       (२)

जकर चिंता मे 
टटाइत रहलहुं 
जकरा लेल 
करैत रहलहुं कबुला 
तकरा 
सांझ सं विहान धरि 
खेत सं दलान  धरि 
तकैत रहलहुं 
आ ओ भेटल 
बसबन्नी मे 
बनबैत फरकी 
हमर अंतिम यात्राक 

     (३)

बात अहांक होइत छल 
ता ठीक सब किछु 
बात हम्मर उठिते 
ओकासी आबि गेल 
आ अहांक पेट रिक्त 
भभाइत छल व्यंजन 
कौर हमर उठल 
भात बासी आबि गेल !

 बात छल ने किछु 
बात बढ़िते गेल 
बिन बाते भाला 
गरासी आबि गेल 
आ जिनगी हमर 
ढूसि सदिखन लेलहुं 
मुइल देखिते किए कानन 
भोकसि आबि गेल. 

        (४)

जिनगी मे जखन किछु भेटै छै 
ठीक तखनहि किछु छुटै छै 
भेटबाक हर्ष मे 
भने छुटबाक दुख 
दबि जाइ छै 
मुदा ओ दुःख 
संजोगल  रहैत छै हिरदय मे 
बेर पर ओ फनफनाइत  छै, दुखाइत छै 
एकर कोनो दबाइ नै छै 
ओ घाओ सुखाइ नै छै 
बस दुखाइ छै 
चिरकाल धरि 








4 comments:

  1. नीक कविता सब !

    ReplyDelete
  2. घावक सुखाइत खैटी के छोड़बैत कविता सब !!

    ReplyDelete
  3. ओ भेटल बँसबन्नीमे ………………… कलियुगक यथार्थ ।

    ReplyDelete

Theme images by enjoynz. Powered by Blogger.