Monday, December 21, 2015

अमरनाथ झा जीक किछु कविता

आभासी पटल (सोशल साइट्स) लोक केँ अपन मोनक अभिव्यक्ति साझा करबाक एकटा सशक्त माध्यमक रूप मे पछिला किछु समय सँ सोझाँ आयल अछि, आ से विलुप्त होयबाक बाट दिस अग्रसर मैथिलीक लेल ई चीज बहुते लाभकारी साबित भेलैए . आइ रचनात्मकताक सभ सँ बेसी उर्वर जमीन फेसबूकक माध्यमे मारिते  रास नव लोक मैथिली मे अपन अभिव्यक्ति प्रकट क' रहल छथि जाहि ठाम पछिला किछु दिन मे जिनक रचना आ टिप्पणी सभ सँ बेसी प्रभावित केलक अछि ओहि मे सँ एक छथि महरैल, मधुबनी निवासी अमरनाथ झा जी. वयस  सँ रिटायर्डक अवस्था मे लिखब आरम्भ केनिहार अमरनाथ  झा जी केँ पहिल बेर प्रकाशित करैत ई-मिथिला अपना कें गौरवान्वित फील करैत अछि. एखन हुनक सात गोत कविता देल जा रहल अछि , पढ़ि केँ अपन विचार जरूर  देब- मॉडरेटर. 

(१). मोन

मोन मे उमड़ल-घुमड़ल भावक
अछि छपाएब नहिं नींक
भाव-व्रण सँ बचवा खाँहिस
उगिलब होइ छइ ठीक ।

मन-मयूर सभ लोक कए
खोलय लागय पाँखि
सिंहावलोकन नेनपन केर
जहिखन देखय आँखि ।
मनक सुनरता अनुपम, होइछै
सौंदर्यक परिभाषा
भाव भेटय जँ एहने मोनक
पुनि नहिं ककरो आशा ।
मोन जुआएल होइ कदपि नहिं
मोन झुलइ अछि मचकी
वाल अवस्था मोन पड़य तँ
आबऽ लागइ हिचकी ।
मोन भने ई बज्जर भऽ जाउ
हिय नहिं पाथर होइ
ईच्छा शक्तिक वलें मनुक्खो
जीवन ई जी लेइ ।
मोनक ताकुत होइत रहै जँ
नहिं ओ पड़तइ फाँस
मुक्त भाव सँ विहरत ,जहिना
मान सरोवर हाँस ।

(२). निषेधक बेध

मद्यपान केर बढ़ल चलनि
दूषित समाज भऽ गेल
वाल,वृद्ध आ युवक, की कहू
सब बेमत्त अछि भेल ।

कर राजस्वक वृद्धि लेल त'
खुजि गेल टोले टोल
जानि कते परिवारो उजड़ल
प्राण गमा अनमोल ।
चाँकि एलइ सरकारो के तैं
घोषित भेल मदिरा बन्न
किंतु, रोक सँ रुकतै वा नहिं
सोचि लोक अछि सन्न ।
मानुष मानस होइछै अजगुत
जौं किछु होइ निषेध
बरजइ नहिं, बरजौने कतबो
काज करइ अरबेध ।
सुरसा सन जनसंख्या बढ़इछ
नहिं हो कोनो विरोध
बे-लगाम भऽ बढ़ले जाइ छइ
कतबो कहय निरोध ।
कक्कर बुत्ता छइ जे रोकत
मदिरा केर टघार
झाँपि-तोपि के चलिते रहतै
नै वरु चलौ उघार ।
मद्य-निषेधक मंशा पाछाँ
चाही निस्सन डेग
वाम-दहिन सँ काज चलै ने
तखने रुकतइ वेग ।

(३). अनुत्तरित प्रश्न

एकटा प्रश्न ठाढ़ समक्ष
भोरे सँ ,अनचोक्के
की छिअइ ई ?
सामाजिक विधान, की विभाजन
सनातनक अंग अभिन्न
जे भऽ गेलैये व्याधिग्रस्त
कर्म सँ विमुख, अगबे गौरव
मिथ्याभिमान
एकटा हथकंडा, पाबि ठाओं संविधान
लऽ लेलकैये विकृत रूप ।
ओना , शनैः शनैः , दोगादोगी
गेंठ फुजि रहलैये
कतेको बहुरिया अयलीहे परछि घ'र
आ, अंगीकृत भेलाहे कतेक ब'र
मुदा फूज' कहाँ देतै !
बोल-वचन किछु, आ करनी किछु आओर
भिन्नता उद्वोधन आ संवर्द्धन मे
तैं तऽ ने ,अजर,अमर ?
विवेचन समाजशास्त्री करथु ।
मुदा, हम ओझराएल छी
सात बरखक पोतीक प्रश्न मे
जे आइ भोरेभोर अनचोक्के पुछलक
" बाबा! जैत की होइ छै ?" ।


(४). ओह !!!

छी अवाक; निस्शब्द
की बाजू ?
कएल गेलै लोमहर्षक काज
घोंटल गेलै एक अवलाक घेंट
फेर चढ़लै दहेज-दानवक भेंट
रोइयाँ भुलकल अछि
लज्जित छी ,समाजक ऐहि रूप पर ।

के करतइ एहन कल्पना
एहनो होइछै कुदरूप मनुक्ख
भावनाक गरदनि मचोड़ि
हरि लेलकै परान
नहिं रहलै पिहुओक धियान
हा दैव ! हे भगवान !
भारतीय संस्कृति मानैये
जेकरा घ'रक लक्ष्मी
मिथिला मे लक्ष्मी घ'र होथि
कोजगराक साँझ मे
मुदा, ओही साँझ झाँपल गेलीह
घरक लक्ष्मी ।
कहबैछै व्रह्म जननिहार
मुदा छै व्रह्मराक्षस
ओह! ओह!!ओह !!!

(५). अकानल डेग

सूनू अकानि
कान दूनू खोलि के
दियौ धियानि ।
रखियौ कात
अनसोहाँत बात
हो अढ़घात ।
गप जे बेस
मोनक पेटारी मे
हो अँटाबेस ।
बात विचारि
हिय जे कहय से
मन मे ताड़ि ।
करू ओ काज
हारिसँ वा जीतसँ
कोनो ने लाज ।
चलय लागू
सिंहावलोकन नै
तकियौ आगू ।

(६).उतरल उतरा:बरसल बुन्न

भेल अकास मे जलद मिलन
बरसि रहल अछि बुन्न
तरसल धरती भीजि रहल
"उतरा" रहल ने सुन्न ।

अन्हरा मे होइ कनहा राजा
सूनल छल ई बात
अदहा "कनहा" बीति गेलै
तखन भेल बुनपात ।
कहिया सँ ने सुनल रहय
पुक्ख ने राखय रुक्ख
मनचातक पियासल रहलै
हेरिते रहल मनुक्ख ।
पुनर्वसू बरिसल बेमोने
आधा-छिदहा ढंग
वसुधा रहल अतृप्त ,आ
उतरल गिरहथ रंग ।
जौं कनियों-किछु आबि जेतै
गिरहथ सभ केर "हाथ"
धान-पान सँ सज्जित होइतै
एहि धरती केर माथ ।
(कनहा=उतरा नक्षत्र, हाथ=हस्त नक्षत्र , पुक्ख= पुष्य नक्षत्र )

 (७). अपने खूनल खाधि मे

अपने खूनल खाधि खसलहुं
हाथ अप्पन अपने कटलहुं
गरदनि देल आनक हाथ
जाल के अपने ओझराओल
अगराही मे अपनहिं जरलहुं । आब के बचौत ।

अलक्ष्य कएल परोपकार
देखौलियै जे दयाभाव
बड़ उपकारी बन' गेलहुं
दया भऽ गेल पैघ दाव
अनंत लेल हक्क,ककर सक्क ? आब के हटौत ।
रच्छ रहितय रक्ष करितहुं
बुद्धि,विवेक आ ग्यांन
निरवल आ अल्पजनक
रखितहुं ओकर ने ध्यान
मुदा देल वहुजन के दान ।आब के बुझौत ।
कृपा,दया, माश्चर्य
सदिखन ले कोना होइ
पौल वस्तु घुरबै क्यो
वरू बर्ष सहश्र होइ
यावत् लेल ई संविधान ।आब के उठौत ।
दौगि रहल निधोख ,मुदा
छोड़य नै बैसाखी
चाहै छै सुविधा ई
पुश्त दर पुश्त राखी
लचरल तऽ लचरले छै । आब के फरिछौत ।
पटरी पर बैसल 'बैंसला'
पेटकुनियाँ देथि पटेल
जतेक वंचित वर्ग अछि
सभ उताहुल भेल
पसाही जौं पसरि जाएत ।आब के मिझौत ।

संपर्क:-

अमरनाथ झा ग्राम+पो0 महरैल(वार्ड नं 12 भाया-झंझारपुर जिला - मधुबनी (बिहार) पिन नं 847404
मोबाइल:-07352654120

3 comments:

  1. ई सब मात्र कविता नहि छियै ! ई सात टा डेग ! सप्तपदी थिकैक ! सब कविता पढ़ल अछि मुदा कक्काक ( अमरनाथ झा ) लिखबाक खासियत अछि जे कतबो बेर पढि जाउ मन नहि भरैछ ! मिथिला क्षेत्रक विशेषता छै जे अतय अमरनाथ नाम के एक स एक बिभूति भेला आ अखनो छथि ! कक्का सेहो अप्पन नाम के सार्थक करैत छथि ! हुनकर छोट छोट टिप्पणी सब बिहारीक सतसैयाँ जेकाँ मारुक होइछ ! कक्का स भेंट त फेसबुक के माध्यम सँ भेल मुदा गप त ई – मिथिलाक कारणे सम्भव भेल ! ताहि लेल हम बाल मुकुंद पाठक के सदिखन आभारी रहब ! कक्का जहन लिखय छथिन त हुनकर काव्य में कै बेर एहन एहन बिसरायल खाँटी मैथिली शब्दक बिलक्षण प्रयोग भेटत जे आश्चर्य चकित करय के अलावे कतेक नव चीज प्रयोग सिखबाक मौका द जाइ छै ! हिनक कविता अहाँ सब प्रायः पहिनहो अवश्य पढ़ने होयब मुदा एक संगे पुनः पढ़बै त पुनः आनन्द नहि भेंटत से असम्भव अछि त आनंद लै जाउ आ संगे पुरान शब्दक नव प्रयोग सेहो सिखने जाउ !
    हम कक्का के सुंदर स्वास्थ्यक कामना करैत आर नव रचना सब के उत्कण्ठा सँ बाट जोहि रहल छी !
    प्रणाम !!
    ---------- ( अश्विनी )

    ReplyDelete
  2. Well articulated poems..that needs attention of critics n readers...

    ReplyDelete
  3. बहुत नीक लागल ।

    ReplyDelete